Астанада, «АИТВ-инфекциясының алдын алу орталығы» МКҚК-да Қоғамдық денсаулық сақтау басқармасы мен Білім басқармасы арасындағы іс-шаралар жоспарын іске асыру шеңберінде «Шаг в будущее» қоғамдық қорымен және Астана қаласы әкімдігінің «Психологиялық қолдау орталығы» КММ-мен бірлесіп ұйымдастырылған білім беру ұйымдарының психологтары мен әлеуметтік педагогтарына арналған екі күндік оқыту семинар-тренингі өтті.

.

Іс-шараға Астана қаласының 60-тан астам маманы қатысты, жастар арасында АИТВ-ны таратудың негізгі мәселелері қаралды, сондай-ақ АИТВ-ның алдын алу бойынша жұмыстың заманауи әдістері берілді.

Аталған семинар-тренинг жастар арасында АИТВ-инфекциясының алдын алу мәселелеріне білім беру саласы қызметкерлерінің назарын аударуға, психологтар мен әлеуметтік қызметкерлерді оқытуға бағытталған. Қатысушылар жасөспірімдер арасындағы мінез-құлық модельдерін және АИТВ жұқтыру қаупін арттыратын жағдайларды талдады.

Ұйымдастырушылардың пікірінше, психологтар маман ретінде жоғары сынып оқушыларының жас ерекшеліктерін жақсы біледі, қажетті көмектің белгілерін тани алады, АИТВ-инфекциясының жаңа жағдайларының алдын алу үшін ықтимал қауіптер мен қауіпсіз мінез-құлық ережелерін айта алады. «Шаг в будущее» қорының басшысы Ажар Тұрымова АИТВ-инфекциясының алдын алу кәмелетке толмағандардың репродуктивті денсаулығын сақтаудың аса маңызды мақсаттарының бірі екенін атап өтті. «Білім беру ортасында кәмелетке толмағандар арасында АИТВ-инфекциясының алдын алу, салауатты және қауіпсіз өмір салты мәдениетін қалыптастыру қажеттілігі «Халық денсаулығы және денсаулық сақтау жүйесі туралы» ҚР Кодексінде бекітілген», - деді ол.

Семинар-тренингтің барлық қатысушылары АИТВ-ның алдын алу курсынан сәтті өткені туралы сертификаттар алды.